「The Rare Moments 攝影工作坊」

2023年03月25日

籌備多時嘅「關愛一站通」《關愛理》攝影工作坊，
'The Rare Moments' 一連兩日喺小天使資源中心舉行，我哋好榮幸邀請到Soulgood Studio嘅兩位好出色又好有愛心嘅攝影師，Zoe & Benson，為我哋一班罕見病、殘疾或特殊需要嘅家庭拍一輯「家庭生活照」！

作為一個病患家庭嘅家長，我哋深切明白想同小朋友拍一輯生活照嘅困難，可謂遙不可及，我哋期望以過來人嘅身份及經驗去協助大家完成一個小小嘅心願！

我哋嘅病患或特殊小朋友有時會唔多合作，一望見個鏡頭就專登擰轉面，影唔夠兩張又哎住要走，轉頭又話要食d嘢先，甚至乎會突然大叫….

然而…. 同路人嘅信任令到場面非常融和，沒有半點尷尬或不安，歡欣嘅笑面更讓我哋克服了所有困難…..
從來都未試過搞一個workshop 會咁悲喜交集，一時就We 嘩大叫，笑聲震天，轉頭講起大家d辛酸史，突然又感同身受，然後抱頭痛哭…..

為咗影輯家庭相，大家各出奇謀，扮貓扮狗扮小丑也在所不惜，道具盡出，都只為搏小朋友一個笑臉，留下美好回憶….. 我哋絕對係搞笑專家，專搞人笑…
後記：兩日之間，影咗近二千張相，最後有幾多張用得我唔知道，但呢個Rare Moments…. 肯定係一個好Rare but Precious 嘅體驗！

後記：
The Rare Moments 嘅推行及初衷，係希望以我哋作為過來人嘅身份及經驗，為病患或特殊需要嘅小朋友拍一輯生活照，協助大家完成一個小小嘅心願！
在拍攝過程當中，我哋會好珍惜互相分享及交流嘅機會，每一個病患家庭都好值得我哋尊重、欣賞及學習！
今日其中一個參與家庭，同我哋兩位攝影師Zoe 同Benson 已過世仔仔（OK仔）嘅情況好類似，一幕幕催淚嘅片段重現Zoe同Benson眼前，彼此嘅共鳴實非文字能夠言喻。
然而，走出陰霾嘅Zoe 同Benson，用愛及行動帶大家逃離傷痛，OK仔雖然已離開咗我哋，但Zoe同Benson 一家人嘅經歷，仍然能夠勉勵其他同路人，繼續用生命去影響生命！
眾所皆知，病患家庭嘅路－啲都唔容易行，我哋更不時會感到無助及氣餒，但沿途路上，能夠有你哋嘅分享及扶持，忽然之間，我覺得The Rare Moments 除咗d相 好靚，成件事仲靚！Zoe & Benson ，你兩個真係冇得頂！
期待好快可以有下一回！

*The Rare Moments 攝影工作坊，為香港天使綜合症基金會聯同Soulgood Journal 兩位善心攝影師自2022年推出嘅創意項目，致力為罕病、殘疾或特殊需要家庭拍攝「家庭照」；作為一個病患家庭嘅家長，我哋深切明白想同特殊需要嘅小朋友拍一輯生活照嘅困難，可謂遙不可及，我哋期望以過來人嘅身份及經驗，去協助大家完成一個小小嘅心願！

會員登入