香港天使綜合症基金會創辦人 分享

occadmin

疫情之下，冇人可以獨善其身，對於我哋一班病患家庭，更加係苦冇對策，寸步難行！

然而…..除咗影響身體上嘅照顧及肢體上嘅訓練，其實心理方面，對我哋都有好大嘅打擊….詠寧確實就喺呢段日子，受到好大嘅情緒困擾而終日自殘身體，令我哋心痛不已……
有冇試過從小天使（病患小朋友）嘅角度出發，想像一下佢哋諗緊啲乜嘢…？

………究竟係咪我做錯咗啲乜嘢？點解爹哋媽咪終日困咗我係屋企，唔俾我出街，冇得返學、冇得訓練，全部活動都取消晒；就算終於有得出街，但一出門口就要用塊布（口罩）遮住我個口，其實知唔知道好唔舒服㗎……！

面對危難（疫情）嘅時候，其實我哋好多時都會手足無措，但怨天尤人絕對唔可能將問題解決，學習接受及包容，與病患（疫情）共存，我深信….總會搵到適合自己嘅生活態度！

抗疫嘅500天，我哋試過每個星期都帶住詠寧到荒山野嶺走走，學習戴口罩，足足學左一年先至成功！亦都試過為左有得游水，全家去staycation 兩日內游3塲！
「山不轉路轉、路不轉人轉！」再苦嘅路，只要一家人齊心，每一件都可以係樂事，苦中作樂呀！

其實….堅持嘅又豈止得我哋，真心感激學校上下老師及職工嘅不離不棄、默默守護及教導，詠寧喺過去兩個月嘅火速回復，進步可謂有目共睹！
各位罕病、殘疾或特殊需要嘅朋友仔，你哋都要加油呀，我哋會沿途作伴，與大家並肩同行！

共勉之！
Joe & Joson
香港天使綜合症基金會創辦人
https://www.facebook.com/HongKongAngelmanSyndromeFoundation/posts/1516882788643252