第一屆香港天使綜合症基金會週年大會

occadmin

小天使聖誕嘉年華2016 喺嘈喧巴閉，歡天喜地嘅笑聲下曲中人散了。言猶在耳，其實當日亦都係我地「第一屆香港天使綜合症基金會週年大會」嘅大日子。我地係嘉年華之前，公佈左HKASF自成立以來第一張成績表。
感謝全體內閣個多月來嘅籌備，週年大會係10多個天使家庭以及顧問團隊代表見證下，順利完成了。席間我地滙報了HKASF自15年6月至16年9月嘅營運報告、財務報表以及來年動向。我地也收集了不少天使家庭及顧問團隊嘅意見，而所有議程亦都在「零反對」下順利獲得通過。
有關HKASF 2015-16年度嘅營運報告及財務報表，稍後會經註冊審計師核實後，上載到我地嘅網站，供市民參考或日後查閲。

日期 : 25-12-2016
時間 : 16 : 00 - 18 : 00
地點 : 灣仔灣景國際2/F
查詢 : info@hkasf.org / +852 5125 8111

2015-2016年度，對於HKASF黎講，確實係充實且豐收嘅一年，透過38篇不同類別嘅媒體報導，令「天使綜合症」由聞所未聞到街知巷聞，我地由1個天使家庭至今集結了25個。係年度期間，大大小小嘅家庭聚會超過50次，還有合共16個訓練課程、工作坊以及講座，實踐了我地致力支援小天使及家庭嘅目標。
對外方面，我地曾舉辦、協辦及參與不同類型嘅公開講座、大學演講以及公開推廣活動。最為人津津樂道的，必定要提去年五月，由我地同將軍澳中心合辦，全港第一個關於天使綜合症嘅展覽會，為期兩週嘅項目，參與嘅義工超過100人次。還有去年六月HKASF 第一個步行籌款活動，即喺科學園舉行嘅Angelman Walk 2016，參加人數超過800人，為HKASF籌得超過卅萬。
HKASF一直致力提供資訊，我地與全球45個AS組織結盟，透過HKASF美侖美奐嘅網站，不定時發放世界各地嘅最新消息。去年我地嘅網站更新項目達100次；還有我地嘅Facebook 專頁，超過500個分享及貼文，令我地嘅fan page ，係1年間Fans 人數已超越2800人。
係過去嘅一年多，HKASF帶領小天使及家庭創下許多個第一次，繼有第一次帶小天使包塲睇戲，成功支援第一個新増個案，以及第一次為天使家庭近親提供產前篩檢服務...等等。勇於嘗試，積極探索嘅精神及態度，為HKASF奠下穩固基石。
HKASF嘅項目、活動及更新雖然多不勝數，但一直以審慎理財行事，自去年1月成為香港認可慈善團體之一，我地更堅守社會責任，所有支出除了有內委會管理，也有顧問會計師全盤監控賬目，以確保所有善款用得其所。根據我地嘅財務報表，去年HKASF嘅常務行政開支，只佔總收入嘅4.4%，而用於支援天使家庭嘅項目，及推廣天使綜合症嘅支出，就各佔總收入嘅18.2%及18.6%。值得一提，HKASF能夠有一個穩健嘅財政狀況，皆因所有顧問、內閣成員及義工，那份無私奉獻，全部不收分毫！
展望將來，HKASF會秉承一貫作風，把握機遇，為小天使及家庭提供合適支援，其中一項新挑戰，是為天使綜合症建立名冊，希望將香港以至華人資料庫注入，為AS科硏提供數據。HKASF也致力帶領天使家庭融入社區，我地更要肩負社會責任，希望係來年能夠為社福傷健界出力。
繼往開來，HKASF需要大家嘅繼續支持及支援，尤其是人手方面，我地誠邀賢能及有志之士加入內閣，希望大家有錢出錢，有力出力。為小天使及家庭謀福之餘，更可以對罕見病患及傷健家庭作出多一點關愛及認同。