特別的女兒造就特別的媽媽 鍾麗淇（上）

Alexman

特別的女兒造就特別的媽媽 鍾麗淇（上）：快樂其實很簡單！
每個媽媽都不容易，不過這個媽媽經歷的更多。

42歲的鍾麗淇10年結婚，11年誕下長女Isabella。結婚生女組織家庭，明明是再平常不過的事，卻被她遇上最不平常的基因病，女兒出生不久被確診患有全港病例只有三宗的四號染色體缺損綜合症，從此生活變得不一樣。鍾麗淇說，曾經傷心過、擔憂過、跌進谷底情緒崩潰過，然後為了女兒和家再次站起來並且想通想透：「上天既然賜我一個特別嘅女兒，應該係希望透過女兒，俾我有機會做一個特別嘅媽媽。」
最壞日子已經過去

家有兩女，8歲的Isabella和3歲的Michela，同時還兼顧瑜珈教練的個人事業，鍾麗淇每天都過得忙忙碌碌，送兩個女兒上學放學、見學生教瑜珈，然後每天中午還要親自趕到學校給Isabella餵飯餵藥：「Isabella入讀特殊學校，本來學校係全日制、校內照顧同設備都好足夠，不過始終佢個病比較特別，中午食完飯要餵癲癇藥、一旦抽筋一定要係我同工人姐姐至識幫佢喺大髀打針，再加上食咗癲癇藥個人會好攰，所以每日午飯我都係盡量親自去餵佢，然後返半日學就接佢返屋企。每日都係咁，我同老公、工人姐姐都習慣咗呢種模式，始終比起最壞嘅日子已經好好多！Isabella六、七個月大時確診患病，開始住院。嗰半年時間，一日病發幾次，郁啲就要送入去ICU。我仲記得有一次被推入去做手術，明明預計三個鐘做完，七個鐘都未推佢出嚟、冇醫護人員話俾我知發生咩事。真係好似拍戲一樣，夜媽媽我喺嗰條完全冇人嘅醫院走廊發晒癲拍晒門，一世人都未試過咁激動，只係想有個人話俾我知個女到底點！」


只願能夠愈做愈好

長女出世第一年，停止工作沒有社交，每天出入醫院全副心神放在女兒身上，直到住院半年後陪著Isabella出院回家，鍾麗淇才驚覺這一役對自己的身心有多大影響：「我有一段時間壓力大到停咗經期、想逼自己出門做吓嘢見吓朋友，但根本放唔到心；一聽個女發燒抽筋，個心離一離，人會即刻反胃想嘔……我諗所有嘢都係一種學習，都需要時間俾自己接受同習慣，生兒育女永遠係一種未知，永遠唔會絕對ready，唯一最清楚嘅，只可以肯定自己係咩人、乜嘢對自己最重要。首先你要承認，唔可以屈住唔可以扮冇嘢，因為真係有嘢呀嘛！要跌，咪俾自己跌到谷底，然後再爬番起身囉！為咗個女，係一定要爬番起身。多謝我天性樂觀，都多謝呢個過程有老公陪我一齊行過，我幫到自己，而家亦都可以做一啲嘢去幫到一啲有同樣經歷嘅爸爸媽媽。Isabella呢個病難中過六合彩，醫生係用一到十去衡量呢種小朋友嘅發展。最差可能過唔到一歲，最好你永遠唔知，我哋可以做嘅，就係盡力帶佢踏出多一步、再帶佢踏出多一步，只希望陪佢一齊愈做愈好。」


http://www.easypama.com.hk/nurturing/art/20190227/28731/?fbclid=IwAR1hc8DTrOdIBXO0_XtiFmGJaA-KgF-4EXq2rsieG6T7IDCeZWr-8BkVggM

Alexman

兩個女兒都是心肝寶貝 鍾麗淇（下）：最好的教育就是身教！

盡量避免厚此薄彼

經歷過第一次，第二次生育女兒對鍾麗淇來說，顯得特別輕鬆又容易：「細女真係好易湊又鍾意笑，頭兩年餵人奶輕鬆順利，話咁易就過咗。不過始終有兩個女，年紀唔同需要都唔同，我更加要小心嘅係照顧佢哋兩個感受同心理。開頭坐月餵細女，冇得送家姐返學陪家姐瞓，我都覺得好內疚唔好受，其實要適應要協調嘅唔止個女，仲有我自己。Michela好細個我就當佢大人咁教，教佢家姐個病叫咩名、病名點讀，教佢家姐需要我哋點樣關注點樣照顧，我抱家姐Michela會扁嘴呷醋，我就教佢，不如你同媽咪一樣抱吓家姐照顧家姐啦。除咗自己屋企人，仲有出面好多異樣眼光要面對呢！個女始終會大，朋友始終會問佢，點解你家姐唔同我哋玩？點解你家姐唔識講嘢？行路慢啲嘅？對外應該用咩態度應該講啲咩，從來就冇一個絕對正確標準嘅答案，我最安慰嘅係，Michela細細個已經好細心、見到家姐需要啲乜，幫家姐搽藥幫家姐按摩，玩到幾開心都好，總會記得返轉頭撩吓家姐陪吓家姐，咁就夠喇！」

嘮叨不如以身作則

八年為人母，問鍾麗淇最大的感受是甚麼？她說幸福和快樂沒有人們想像的那麼難追求：「為人父母，我哋總想俾小朋友最好嘅，總想再賺多啲錢，再買大間啲嘅屋。不過每個人都明，錢永遠唔會搵得晒，間屋再大唔代表人就變得快樂，一個屋企有愛有笑聲，其實已經好足夠。身邊朋友細細個就帶仔女報名校做各種評估，我就覺得童年唔應該經歷呢啲，幼兒時期最好嘅教育一定係來自父母嘅陪伴同教導。你日哦日哦講幾多道理、俾佢睇幾多書都好，實際效果唔會好得過父母親身做俾佢睇，正如一個飛機師讀幾多書都好，你唔俾佢親自操作架真飛機，讀咁多書有用咩？所以我叫佢唔好發脾氣，我自己就唔會隨便鬧人；我性格樂觀鍾意笑，佢自然學到我一樣容易氹自己開心；我哋對屋企人對朋友好，對長輩有禮貌，佢會學識尊重同規矩，學識愛錫照顧身邊人；仲有爸爸，總係用好多時間陪家姐陪佢玩，兩父女成日玩啲只得佢哋兩個明嘅遊戲同玩笑，呢啲相處時光同從小建立家嘅概念，對小朋友嘅影響就真正係一世！」

http://www.easypama.com.hk/nurturing/art/20190228/28748/